ტრაქეობრონქიალური სტენტირება, მარცხენა მთავარი ბრონქის ნაწიბუროვანი სტენოზი

პაციენტი 49 წლის მამაკაცი. 2007 წ-ს ჩაუტარდა ტუბსაწინააღმდეგო ქიმიოთერაპია ფილტვების ტუბერკულოზის გამო. 2015 წ-ს ჰქონდა რელაფსი. წლების განმავლობაში პაციენტს ჰქონდა ქოშინი, მზარდი სუნთქვის უკმარისობა, რის გამოც ხშირად საჭიროებდა ჰოსპიტალიზაციას. 2016 წლის სპირომეტრიული მონაცემებით ჰქონდა სასუნთქი გზების ობსტრუქციის მე-4 ხარისხი. გულმკერდის კტ კვლევით ინახა მკვეთრად დეფორმული ტრაქეობრონქული კუთხე, მარჯვენა ფილტვის ზედა წილში არსებული უხეში ფიბროზული ცვლილებები, ქვედა წილის უმეტეს ნაწილში გიგანტური ემფიზემატოზური ბულები, ხოლო მარცხენა მთავარი ბრონქის სანათურის შევიწროება 3 მმ-მდე. ბრონქოსკოპიულად ინახა მარცხენა მთავარი ბრონქის ნაწიბუროვანი სტენოზი. პაციენტის მდგომარეობა დღითიდღე უარესდებოდა, შეტევითი მოხრჩობის შეგრძნების გამო ხშირად უწევდა სასწრაფო დახმარების გამოძახება. გადაწყდა ტრაქეობრონქიალური სტენტირება, როგორც არსებული მდგომარეობიდან ერთადერთი გამოსავალი. ზოგადი ანესთეზიით, რიგიდული ბრონქოსკოპის გამოყენებით და რენტგენის კონტროლით განხორციელდა Braun 0,035 ვაიერების პასაჟი მარჯვენა და მარცხენა მთავარ ბრონქებში, შემდგომ გაიშალა ტრაქეობრონქიალური თვითგანშლადი სტენტი (M.D.-18mm;T.L.-40mm;L-14mmX25mm;R-14mmX25mm) ტრაქეასა და ორივე მთავარ ბრონქში. მანიპულაციის შემდეგ პაციენტის სუნთქვითი პარამეტრები საგრძნობლად გაუმჯობესდა. მანიპულაციიდან ერთი თვის შემდეგ თავს დამაკმაყოფილებლად გრძნობს.